Aprè Jij A.i Duniel Dimanche te fè arete l nan kad dosye kòripsyon pou materyèl CNE yo, jij Merlan Belabre fè libere jodi mèkredi 27 mas 2024 la, ansyen depite Cholzer Chancy. Jij la pran desizyon sa a aprè plizyè tan ap koute akize a nan kabinè l jodi a.
Si jij A.i Duniel Dimanche te jwenn prèv pou mete nan prizon ansyen palmantè a, ebyen nouvo jij ki nonmen pou jere dosye koripsyon nan Sant Nasyonal Ekipman (CNE) an, jij Merlan Belabre li menm pran desizyon jodi a menm pou libere ansyen prezidan chanm depite a, Cholzer Chancy.
Desizyon sa a pran kèk tan aprè manda jij Dimanche te fini nan mwa fevriye a, kote otorite nan Konsèy Siperyè Pouvwa Jidisyè (CSPJ) te tou pwofite entèdi jij la aji nan dosye sa a. Puiske avan sa a, majistra a te al poze sele sou 2 lokal Sant Nasyonal Ekipman (CNE) yo nan zòn Kanapevè ak Site Solèy.
N ap raple n, nan menm rapò Inite Lit Kont Koripsyon (ULCC) te sòti nan mwa novanm 2023 a sou ekipman CNE yo, jij la te voye 36 manda dèyè palmantè tankou Willot Joseph, Clovis Obas, François Malherbe, Pierre Bel Ange ak lòt ankò.
© Tous droits réservés – Groupe Média MAGHAITI 2024
