Aprè plis pase yon mwa bloke deyò peyi a, minis jistis la, Emmelie Prophète ak minis zafè etranjè a, Victor Généus resi antre an Ayiti. Selon Radio Métronome, moun sa yo sou sòl ayisyen an depi ayè madi 26 mas 2024 la puiske yo te pwofite vini nan vòl espesyal konpayi Sunrise Airways kòmanse fè yo.
Finalman 2 manm gouvènman Ariel Henry a resi ateri Ayiti e, medya a fè kwè yo ta deja antre Pòtoprens sou pwoteksyon yon blende lapolis, tout sa a se aprè nèg ak zam te deside atake ayewopò Toussaint Louverture a. An konsekans, tout aktivite ayeryen yo te sispann kote Etazini, Lafrans, Sendomeng te anile tout vòl yo te genyen sou peyi a.
Minis jistis la li menm, nan yon premye tan te bloke Repiblik Dominikèn aprè Vòl Air Caraïbe ki fè Lafrans ak Ayiti te oblije ateri nan peyi Sendomeng 4 mas 2024 la, akòz van panik ki te kòmanse ap soufle sou Ayiti a. Yon lòt kote, akòz move akèy li te jwenn nan men gouvènman Abinader la, minis Emmelie Prophète te blije kite Sendomeng pou al Etazini nan jou ki te madi 5 mas la.
Si yo 2 a gen chans antre Ayiti, James Cadet ki se minis ekonomi ak finans li menm toujou paka vini puiske li fè pati delegasyon ki avèk premye minis Ariel Henry a. Selon jounal entènasyonal yo, chèf gouvènman an pou moman an anba gwo siveyans Etazini, sepandan jouskounya poko gen yon dat retou pou delegasyon sa a.
© Tous droits réservés – Groupe Média MAGHAITI 2024
