Jounalis Lucien Jura ki se ansyen pòt pawòl laprezidans sou Michel Joseph Martelly pandan anviwon 3 lane, jwenn liberasyon l kont lajan jodi jedi 21 mas 2024 la. Nèg ak zam te kidnape l ansanm avèk 3 lòt moun nan dat ki te lendi 18 mas ki sot pase a. Se frè li Erick Jura ki konfime enfòmasyon an pou Mag Haïti.
“Li jwenn li liberasyon li aprè midi a, men se pou lajan. Mwen pale ak li li pa sibi maltretans m’en eta sikolojik li pa twò nòmal pou kounya“, se sa Erick Jura fè nou konnen.
Li se avoka epi ansyen jounalis Télémax ak Signal F.M, yo te kidnape l nan komin Petyonvil, presizeman nan zòn Vivy Mitchell, pandan li te akonpanye avèk 2 lòt moun ankò.
Komin Petyonvil ki gen gwoup gang kraze baryè k ap opere ladan l te pral antre lakay ansyen pòt pawòl laprezidans lan epi menm rive ale avèk li nan lendi 18 mas pase a, pandanstan fanmi kominikatè a pa bay okenn detay sou kantite lajan yo peye ki rive mete l deyò nan men kidnapè yo.
Nan moman n ap ekri a, bandi ak zam pa sispann simen latwoublay nan zòn pòtay Lewogàn, mache Salomon, Channmas, Nerèt, elatriye. Konsa gen plizyè lajan ak telefòn endividi vòlè sou kèk sitwayen pandan atak bandi ak zam yo fè yo.
Atik sa se pwopriyete prive ©️ Gwoup Medya MAGHAITI 2024
