Ajans Nasyonzini pou Refijye (HCR) mande pou pwoteje ayisyen yo epi ba yo yon estati refijye jounen jodi mèkredi 20 mas 2024 la. Yo fè demann sa a akoz sitiyasyon vyolans k ap vale teren nan peyi a, presizeman nan kè kapital la.
«Lavi, sekirite epi libète Ayisyen yo menase parapò ak vyolans gang yo pa sispann fè epi vyolasyon dwa moun yo», chèf divizyon pwoteksyon entènasyonal la, Elizabeth Tan, fè konnen atravè yon kominike.
Depi 29 fevriye 2024 ki sot pase a, bandi ak zam pa sispann simen laperèz ak latwoublay nan peyi a, kote plizyè enstitisyon prive ak piblik sibi zak vandal ak piyaj, plizyè moun oblije pati kite kay yo. Yon sitiyasyon ki lakoz anpil anbasad oblije fèmen pòt yo ak transpòte pèsonèl yo nan peyi Repiblik Dominikèn. Sitiyasyon sa a kreye gwo enkyetid pa bò kote HRC.
«Li soulinye yon dividal Ayisyen ka benefisye konvansyon relatif ak refijye yo ki siyen an 1951: Militan politik, Jounalis, jij, avoka epi lòt moun k ap lite kont koripsyon ak kriminalite. Epi li te kontinye pou l raple yo deklarasyon katajenn an 1984, ki la pou pwoteje dwa tout endividi ki touche avèk sikonstans grav epi pwoblèm vyolans nan peyi yo, sitou zòn ki gangsterize yo», se sa n ta ka li nan kominike HCR la sou pwoteksyon lavi Ayisyen yo nan sikonstans difisil sa a.
Òganizasyon sa a ki la pou li pwoteje lavi refijye yo rete kwè moman an pa pwopis ditou pou yo ta voye Ayisyen tounen Lakay yo, men pito ofri yo posibilite pou posede lòt estati kòm refijye nan peyi yo ye a.
Atik sa se pwopriyete prive ©️ Gwoup Medya MAGHAITI 2024
