Pandan popilasyon sivil la ap viktim nan yon bò, polisye yo yo menm nan yon lòt bò kontinye ap tonbe anba bal bandi. Selon Sendika Nasyonal Lapolis la (SYNAPOHA), jodi mèkredi 20 mas 2024 la bandi ak zam rive touye polisye Noël Anel nan zòn Dèlma 72.
“Efektivman gen polisye Noël Anel ki te fè pati 17yèm pwomosyon lapolis rive tonbe anba bal nèg ak zam nan zòn Delma 72 nan mitan jounen mèkredi 20 mas 2024 la“, daprè sa sendika a fè konnen sou kont X (Twitter) yo pandan responsab yo site yon sous polisyè nan sou komisarya Dèlma 62 a ki fè kwè viktim nan t ap travay nan Inite sekirite Laprimati (USPM).
Pou kounye a, Lionel Lazarre, kowòdonatè SYNAPOHA a, konfye nou sikonstans lanmò polisye a poko detèmine byenke se nèg ak zam ki retire lavi ajan fòs lòd la.
N ap fè konnen, responsab yo nan lapolis la nan yon nòt yo sòti ayè madi 19 mas la fè tout moun konnen depi pandan wikenn nan lapolis tanmen yon latriye operasyon nan baz gang yo. Kèk zòn tankou Dèlma 6, Laboul, Tomasen Wout Frè, Bèlvil, Sant Vil Pòtoprens la ak lòt zòn ankò kote yo fè konprann gen plizyè manm gang ki tonbe, yo sezi plizyè zam lagè, 4 machin epi popilasyon an menm te rive boule yon dizèn moto pou endividi yo.
Atik sa se pwopriyete prive ©️ Gwoup Medya MAGHAITI 2024
