Pwofesè Jean Gabriel Herard ki se papa ansyen chèf Inite Sekirite Jeneral Palè Nasyonal la (USGPN), Dimitri Herard mouri nan peyi Bèljik aprè kansè kolon te fin mete men sou li. Nan sikonstans sa, Responsab yo nan Inivèsite Leta (ILA) espesyalman nan INAGHEI eksprime tristès yo ak lanmò youn nan kò profesoral yo a ki fè plizyè lane t ap ba yo sèvis.
“Dekana Enstiti Nasyonal Administrasyon Jesyon Wo Etid Entènasyonal (INAGHEI) aprann avèk kè sere nouvèl lanmò pwofesè Jean Gabriel Herard, samdi 16 mas 2024 la, aprè yon bon tan nan maladi”, daprè sa doyen inivèsite a, Dr Thadal Étienne ekri nan yon nòt yo mete deyò nan lannuit dimanch 17 mas la.
Defen an te travay pandan 20 lane nan INAGHEI kote l te anseye dwa sosyal ak ekonomi ayisyèn. Mete sou sa responsab la mansyone pwofesè Herard te kòdonatè nan depatman Syans politik la pandan yon 10èn ane sòti nan lane 2011 pou rive 2022 swa aprè l te vin pa disponib ankò.
Jean Gabriel Herard pa t sèlman pwofesè, men li te yon jounalis e l te yon gwo militan politik nan epòk gouvènans diktatè Jean Claude Duvalier a. Se konsa, sou rejim sa li te menm pran prizon pou pozisyon l e te jwenn liberasyon l jous aprè “baby Doc” te kite pouvwa an nan lane 1986.
Atik sa se pwopriyete prive ©️ Gwoup Medya MAGHAITI 2024
