Sena Ameriken an konfime jodi jedi 14 mas 2024 la, yo gen yon nouvo anbasadè ameriken pou Ayiti ki se Dennis Hankins, atravè vòt yo bay. Mezon blanch deklare li vrèman ijan pou Hankins pran fonksyon li nan moman difisil peyi Dayiti ap konnen an, kote gang yo atake divès pòs polis ak prizon nan kapital la, e menm menase y ap ranvèse gouvènman tranzisyon nan peyi a.
“Se yon moman kritik pou nou asire nou gen yon nouvo anbasadè anplas“, selon deklarasyon konseye kominikasyon Sekirite Nasyonal ameriken an, John Kirby. Pou ajoute li fè konnen : «Nou gen bezwen ak ijans pou mete l anplas », paske eksperyans Hankins, pral yon avantaj esansyèl pandan prezidan Etazini an ap fè presyon pou deplwaman yon fòs sekirite miltinasyonal an Ayiti, ki pral gen nan tèt li peyi Kenya.
Diplis, yo fè konnen yon pati nan karyè li antanke diplomat se an Afrik li fè l. Epi li te direktè adjwen pou lapè nan Washington tou.
Pou sa ki gen pou wè ak lang, yo di li pale Fransè, Pòtigè epi Endonezyen, e se prezidan Joe Biden, ki te nonmen li pou yon lane. Li plis pase 40 an eksperyans nan kèk pòs ki pi difisil nan mond lan, presizeman nan peyi Soudan ak Kongo. Li te anbasadè tou pou Mali ak Gine. Nouvo anbasadè a menm pale kreyòl, puiske li te kòmanse karyè li an Ayiti epi li te anbasadè Repiblik Togo. Eksperyans Hanskins an Ayiti, se te kòm chèf viza (Non-immigrant) ak kwòdonatè refijye Etazini yo.
“Washington, Hankins te direktè adjwen pou lapè, ofisyèl siveyans sipèvizè epi ofisye biwo Angola, Hankins te pran yon bakaloreya nan inivèsite « Georgetown » epi yon metriz Nasyonal War Collège”, daprè jounal Miami Herald.
Pandan tout karyè li, Hankins, te sèvi 3 fwa kòm chèf misyon adjwen nan peyi Soudan, Moritani, Mozanbik epi antanke ofisye prensipal «Sao Paulo» ak konsil jeneral nan Riyad. Men majorite karyè l kòm diplomat te fèt an Afrik. Sa ki selon estimasyon yo pral kapab yon benefis pou fè vini 1 000 polisye Kenya yo ak akonpanye fòs miltinasyonal sa nan peyi Dayiti.
Atik sa se pwopriyete prive ©️ Gwoup Medya MAGHAITI 2024
