Sendika Nasyonal Lapolis la (SYNAPOHA), anonse jodi madi 12 mas 2024 la, kò polis la pèdi 2 polisye sòti ayè lendi a pou rive jodi a. Daprè sa responsab yo fè konnen, ajan fòs lòd sa yo se maladi ki pote yo ale.
Polisyè Antoine Edwidge mouri lendi 11 mas 2024 la, selon SYNAPOHA a ajan fòs lòd la te malad. Se menm ka a tou pou polisye Estinor Angelot li menm, ki al mouri lopital aprè yon kriz te pran l nan komisarya Dèlma 62 a. Toulède polisye sa yo te sòti nan 31yèm pwomosyon lapolis la.
“Daprè responsab sou Komisarya Dèlma 62 a enspektè Divizyonè Dosthene Idel, li fè SYNAPOHA a konnen polisye Estinor Angelot te konn gen kriz la deja lè l pran l maten an yo kouri mennen l lopital lè l rive aprè 45 minit doktè a deklare l mouri”, daprè detay sendika a bay sou kont X (Twitter) yo.
Pou kounya, non 2 polisye sa yo ajoute sou lis 6 polisye nèg ak zam te ansasinen 29 fevriye pase a, sa ki fè nan kèk jou sèlman enstitisyon lapolis la pèdi anviwon 8 polisye. Sepandan, n ap fè konnen tou 33yèm pwomosyon lapolis la gradye ayè lendi 11 mas 2024 la, kote gen 786 polisye ki pare pou al antre sou teren an pou pwoteje epi sèvi popilasyon ayisyen an.
Atik sa se pwopriyete prive ©️ Gwoup Medya MAGHAITI 2024
