Nan yon nòt yo fè sòti jodi lendi 11 mas 2024 la, Rektora Inivèsite Leta yo bay yon bilan pasyèl sou atak bandi ak zam te fè sou Fakilte Agwonomi ak Medsin Veterinè (FAMV)a 29 fevriye pase a. Responsab yo fè konnen pandan atak sa, gen divès materyèl enpòtan fakilte a endividi yo te pran, tankou pano solè, invètè, laptòp, kabann, telefòn, elatriye.
“Pandan yo pase a, kriminèl yo pote ale yon kantite materyèl enpòtan pou fonksyonman enstitisyon an. Yo pran 118 pano solè 275 watts, 12 invètè 10 kilowatts ak tout regilatè, 122 Desktop (òdinatè), 35 laptòp, 42 enprimant nwa/blan, 12 enprimant koulè, 130 tablèt Lenovo, 87 biwo, 100 chèz biwo ak 127 chèz vizitè, 126 klasè metalik, 152 vantilatè, 23 water coolor, 73 UPS Forzan, 32 table gran fòma, 320 chèz tab, 250 matela etidyan, 72 telefòn etidyan, 82 pòt dòtwa etidyan yo, e yon gwo kantite lòt mèb(pupitres)“, daprè bilan pasyèl yo bay la.
Mete sou gwo kantite materyèl sa yo, responsab ILA yo fè konnen tou FAMV, pèdi plizyè lòt dokiman akademik, administratif, ak divès ekipman laboratwa. Yo presize, nan yo tan tou kout y ap gen pou bay yon pi gwo bilan sou sa yo pèdi yo puiske jouskaprezan yo nan moman evalyasyon toujou.
N ap fè konnen nan menm vag ensekirite a, plizyè endividi te rive fòse baryè Fakilte Lenguistik Aplike samdi ki te 9 mas 2024 la, kote yo okipe espas la depi jou a pou yo pran refij. Nan menm sans sa, Rektora a te pwofite denonse ayè dimanch la konpòtman sila pandan yo mande fòs lòd yo pote yo sekou pou yo kapab repran kontwòl espas fakilte a, e yo mande pou leta pran responsablite l tou pou pèmèt moun sa retounen lakay yo.
Atik sa se pwopriyete prive ©️ Gwoup Medya MAGHAITI 2024
