Aprè 5 jou kouvrefe ki te dwe bout jodi lendi 11 mas 2024 la, gouvènman ayisyen an sou lòd Patrick Michel Boisvert, anonse depi jodi a ankò gen kouvrefe pou rive jous jedi 14 mas k ap vini la. Menmsi 2 premye kouvrefe yo pa t itil anyen, gouvènman an presize desizyon sa se toujou nan kad pou reprann kontwòl sitiyasyon an nan peyi a, se pou sa yo tou entèdi moun manifeste pandan peryòd eta ijans yo pran an tou.
“Nan lide pou tabli lòd epi pran mezi ki egal pou n reprann kontwòl sitiyasyon an, gouvènman an dekrete yon kouvrefe sou tout teritwa a sòti 7è nan aswè pou 5è nan maten“, se sa yo di nan kominike nimewo 3 sa pandan yo soulinye mezi sa ap pran sòti jodi lendi a menm pou rive jedi 14 mas 2024 la.
Sepandan kontrèman ak 3 premye jou kouvrefe ki te bay deja yo, gouvènman an fè tout moun konnen pandan mwa eta ijans la ki dekrete a pinga gen pyès mouvman manifestasyon nan depatman lwès la. Sa konsène tout wout piblik yo e li valab pou lannuit tankou lajounen. Konsa, yo soulinye fòs lòd yo resevwa bonjan lòd pou fè kèlkeswa moun li ye a respekte desizyon sa e pou yo arete tout moun ki kont lide sa tou.
N ap raple selon sa otorite yo di, mezi sa yo pa konsène ajan fòs piblik ki an sèvis yo, ponpye, anbilansye, pèsonèl sante yo ak tout jounalis ki ka byen idantifye yo.
Atik sa se pwopriyete prive ©️ Gwoup Medya MAGHAITI 2024
