Kominote Karayib la (CARICOM) mande yon rankont an Ijans avèk divès peyi tankou Etazini, Kanada, Lafrans epi ONU nan lide pou diskite sou sitiyasyon kritik an Ayiti a. Selon sa yo fè konnen reyinyon sila ap fèt nan dat lendi 11 mas 2024 la, nan peyi Jamayik presizeman nan vil Kingston.
Rankont sila a pral gen pou li abòde divès pwen, presizeman kesyon sekirite, estabilizasyon epi founiti pou èd imanitè nan peyi Dayiti.
“Mwen mande ak Peyi Etazini, Lafrans, Kanada epi Òganizasyon Nasyonzini pou rejwenn nou nan yon reyinyon nan vil «Kingston» peyi Jamayik jis pou n ka abòde sitiyasyon Ayiti a“, selon prezidan Giyan nan, Irfaan Ali, nan kad dosye Ayiti a.
Peyi Dayiti ki vrèman nan yon sitiyasyon difisil, kote bandi ak zam ak Lapolis pa sispann afwonte aprè Ariel Henry te fin pati ki te tèt peyi a depi dat 29 fevriye 2024 la, alòske plizyè enstitisyon prive ak piblik gentan piye ak boule epi plizyè moun gentan mouri nan moman sa yo.
“Malgre pwogrè yo, sitiyasyon an Ayiti a rete preyokipe nou, sa nesesite tout yon aksyon konkrè nan pli wo nivo a, pandan n ap voye yon mesaj soutyen ak CARICOM epi kominote entènasyonal la pou n la leve defi Ayiti aktyèlman”, toujou deklarasyon Irfaan Ali, sou konvokasyon pou rankont sila.
Pou fini, kominote entènasyonal la mansyone enpòtans angajman ak detèminasyon patnè entènasyonal yo pou ede pèp ayisyen an sòti nan peryòd kriz l ap travèse a.
Atik sa se pwopriyete prive ©️ Gwoup Medya MAGHAITI 2024
