Nan yon nòt Asosyasyon Lopital Prive(AHPH) yo mete deyò jounen jodi jedi 7 mas 2024 a, yo denonse sitiyasyon panik nèg ak zam koze nan peyi a. Yo fè l konsa, puiske yo estime sitiyasyon an touche fonksyoman plizyè sektè ak enstitisyon nan peyi a, atò lopital pa epanye anba zak sa yo.
“Aksyon vyolans yo gen gwo konsekans sou etablisman lopital yo, kidonk Asosyasyon Lopital Prive yo deplore sa ak mande pou otorite yo asire yo pou sèvis medikal yo kontinye, paske yo vrèman esansyèl nan sikonstans parèy la, se sa ki ekri nan nòt AHPH.
Sitiyasyon ensekirite jeneral sa vrèman ogmante kondisyon difisil pou nou ta fè operasyon nou yo, lè n konnen plizyè lopital gentan viktim zak vyolans tankou : Lopital Saint François Sales, Lopital Invesite leta Dayiti epi DASH ki chita kò l Dèlma 18 la, pou kontinye vanse nan nòt Asosyasyon an sòti a.
Anplis, yo mansyone lopital yo ap fè fas avèk pwoblèm ratman matyè premye nan medikaman yo, pwoblèm gaz epi oksijèn. Kidonk, pwoblèm sa yo vrèman anpeche yo reponn avèk bezwen medikal pasyan yo an ijans.
“Moun k ap travay lopital yo ap fè fas avèk anpil difikilte, sitou nan deplasman yo an tout sekirite. Sa ki riske mete mete difikilte pou n kontinye nan swen sante an akòz klima sila», toujou nan lide pou prezante pwoblèm ensekirite a bay, sitou nan lopital yo.
Antite sanitè sila mande pou tout enstans konsène yo pou pote asistans avèk yo nan objektif pou ka fasilite yo kontinye ak swen medikal yo epi garanti sekirite pèsonèl sante yo ak tout lopital yo.
Atik sa se pwopriyete prive ©️ Gwoup Medya MAGHAITI 2024
