Alòske 3 jou kouvrefe yo te dekrete a jouskounya pa pote okenn rezilta, jodi jedi 7 mas 2024 la, Konsèy minis la pran desizyon pou pwolonje pou yon mwa eta ijans sekiritè sou tout depatman lwès la. Desizyon sila pran, nan yon kontèks kote menm premye minis Ariel Henry ak minis jistis la, Emmelie Prophète, bloke deyò peyi a akòz vyolans gang yo nan peyi a.
“Arete pou mete eta ijans sekiritè sou tout depatman lwès la pou yon peryòd yon mwa”, daprè sa jounal le Moniteur fè sòti maten an san bliye site divès kalte akò ki te siyen an septanm 2021 ak akò 21 desanm 2022 a ki favorab pou yon gouvènans trankil epi efikas.
Sepandan, se vre Konsèy minis la deside mete Pòtoprens sou alèt pou yon mwa men jouskaprezan ni pou premye 3 jou yo ni pou kounya okenn dispozisyon pa pran pou jwenn yon solisyon ak kriz sekirite a vrèman. Puiske, nan tout lari a pa gen prezans polisyè mete sou sa nèg ak zam yo yo menm pa sispann boule sou komisarya yo, dènye ka a se sou komisarya Mache Salomon an yo piye aprè yo pike dife nan li nan lannuit mèkredi 6 mas la.
Atik sa se pwopriyete prive ©️ Gwoup Medya MAGHAITI 2024
