Nan yon atik jounal Miami Herald ekri nan lannuit madi 5 mas 2024 la, yo fè konnen prezidan kenyan an, William Ruto fè kwè li kapab fè 1000 polisye l yo deplwaye nan sèlman 72è tan nan peyi a. Sepandan, chèf leta a di sa ap rive fèt se si lajan misyon an nan 2 pla men yo.
“Prezidan kenyan an, William Ruto te deklare responsab ameriken ak ayisyen yo li kapab prepare twoup li a pou yo pati nan 72è tan“, selon sa jounal floridyen an fè remake. Yo di konsa, gouvènman ameriken an li menm gen bonjan lespwa sou Kenya, alòske menm yo menm ankò te fè konnen yo pap voye sòlda yo an Ayiti. Mete sou sa, menm 200 milyon dola vèt yo ta dwe bay la, jounen jodi a lejislati repibliken espesyalman James Risch pou Idaho ak Michael McCaul pou Teksas
mete pinga pou lajan sa pa debloke.
Selon jounal la, moun sa yo, ki se youn aprè lòt manm komisyon relasyon etranjè Sena yo, ak prezidan komisyon zafè etranjè chanm reprezantan yo, kritike gouvènman an ki pa menm ka bay rapò sou yon 10 milyon yo te bay sou dosye sa deja. Kidonk, pou omwen 50 milyon debloke fòk gen yon plan detaye ki bay paske lejislati a eksprime laperèz yo pou pwogram sa ki pa menm teste a.
Poutan, selon presizyon yo finansman ameriken an plis pase nesesè paske lajan yo a ap sèvi pou planifikasyon yo ak pou fòs la ka deplwaye. Menm responsab ameriken yo rekonèt se yo ki anpeche aksyon rapid la. Enbyen, mesye Ruto kanpe pou di san lajan twoup li a pap fè yon pa.
Paralèlman, Law Society peyi Kenya egzije gouvènman yo a pou mete deyò akò yo te siyen avèk Ayiti a. Prezidan sosyete a, Eric Theuri di depi akò a pa konfòm ak lalwa yo pap pran tan pou fè yon aksyon nan lajistis kont gouvènman an puiske yo fè konnen Menm yo menm tou, yo kont deplwaman an.
Atik sa se pwopriyete prive ©️ Gwoup Medya MAGHAITI 2024
