Alòske yo pran desizyon pou fèmen fwontyè terès avèk Ayiti, Konsèy Aviyasyon Sivil dominiken an(JAC) deside fèmen jodi madi 5 mas 2024 la, liy ayeryen yo a. Selon N Digital, desizyon sa aplikab depi jodi a, sa ki fè tou depi se vòl ki prale oubyen k ap sòti Ayiti tout sispann.
Se prezidan JAC a menm, José Ernesto Marte Piantini ki apènn anonse nouvèl la jodi a, selon yon rezolisyon n⁰46-2024 yo pran. N Digital fè kwè rezolisyon sa a pran gras ak atik 9 nan konvansyon Aviyasyon Sivil Entènasyonal la.
“Desizyon sispann transpò ayeryen an konsène kit pasaje, kit machandiz ant 2 peyi yo, e li tou aplikab”, daprè sa otorite a fè konnen.
Sepandan, avan menm desizyon sa te resi pran an jounal dominiken an soulinye li pase nan Ministè Zafè Etranjè Repiblik Dominikèn nan, nan Ministè Defans, nan Fòs Ayeryen Dominikèn nan, ak nan Ministè Touris epi nan Direksyon Jeneral dwàn yo a. Mete sou sa li pase tou nan anviwon yon 10èn lòt antite ki gen rapò ak vwa ayeryen yo genyen espesyalman nan ayewopò yo.
N ap fè konnen, pou kouwè l ye la ni premye minis Ariel Henry, ni minis jistis la, Emmelie Prophète Milcé ki te dwe rive Ayiti depi ayè lendi a, twouve yo bloke kote yo ye a. Se nonsèlman akòz presyon nèg ak zam epi kèk sitwayen, men tou akòz vòl ki pa genyen sou ayiti e akòz dezisyon Repiblik Dominikèn apènn pran nan moman sa la.
Atik sa se pwopriyete prive ©️ Gwoup Medya MAGHAITI 2024
