Bandi ak zam moun pa rive idantifye antre ayè lendi a 4 mas 2024 la, nan Enstiti Nasyonal Siperyè Fòmasyon Saj-Fanm(INSFSF) yo plis konnen sou non lekòl saj fanm. Daprè sa yon etidyan fè n konnen jodi madi 5 mas la yo ta pote ale tout machinn ki te nan lakou lekòl la ki chita kò l nan ri Monseyè Giyou.
“Wi se vre, yo antre nan lekòl la ayè lendi a yo estat tout machinn ki te gen sou lakou a epi ale ak yo“, daprè sa etidyan an konfime pou nou san bliye mansyone pandan atak la endividi yo pran kle lekòl la nan men sekirite a.
Pou sa ki gade dega yo fè pandan yo antre nan lokal la anplis divès materyèl yo pote ale, sous nou an di nou tou sekirite enstitisyon an pran anpil kou nan men yo. E yo menm pwomèt y ap tounen nan espas la, daprè presizyon li pote.
Pou kounya, menm jan ak lekòl sila plizyè lòt enstitisyon te sibi menm atak yo tou pandan dènye jou kou sa yo tankou fakilte Agwonomi ak Medsin Veterinè (FAMV), lopital Saint François de Sales, santral Ofis Asirans Machin Pou wout (OAVCT) pou n site sa yo sèlman.
Atik sa se pwopriyete prive ©️ Gwoup Medya MAGHAITI 2024
