Nan yon tuit yo fè jodi dimanch 3 mas 2024 la, Sendika Nasyonal Lapolis la(SYNAPOHA) revele gen gwo danje ki peze sou Baz Kò Entèvansyon ak Mentye Lòd(CIMO) ki twouve l Dèlma 2 a. Se pou sa, menm jan SPNH-17 te fè l pou penitansye nasyonal la, yo menm yo tanmen lanse yon SOS pou Wo kòmandman an ka pran tout dispozisyon pou pare ak nenpòt atak ki ta fèt sou kò sa nan lapolis la.
“SYNAPOHA a ap lanse SOS pou baz CIMO a ki gen gwo menas sou li, mesye yo bloke dèlma 3 ak Dèlma 6, y ap fè anpil mannèv pou yo bloke wout pis la pou yo ka mete baz CIMO a nan mitan pou atake l”, se enyèm mesaj detrès Sendika a lanse pou eseye sove lavi polisye yo ki parèt plis an danje pandan dènye jou sa yo.
Pou sa pa fini menm jan ak sou 3 sou komisarya yo e prizon sivil Pòtoprens la, responsab yo nan SYNAPOHA di yo espere Direksyon Jeneral lapolis la pa pran “ala lejè” nouvo menas sa yo.
Yon lòt kote, pou sa ki konsène 99 prizonye ki te rete nan Penitansye Nasyonal la, selon Kolektif Avoka yo Pou Defans Dwa Moun(CADDHO), lapolis ta pran dispozisyon pou deplase yo al mete nan ansyen prizon sivil medam yo nan zòn Petyonvil.
Atik sa se pwopriyete prive ©️ Gwoup Medya MAGHAITI 2024
