Aprè nèg ak zam te rive kase yon pati nan Penitansye Nasyonal nan lannuit samedi 2 mas 2024 la, mèsenè kolonbyen yo ki enplike nan lanmò Jovenel Moïse la di yo pap sòti. Atravè divès videyo k ap sikile sou rezo sosyo yo, plizyè nan yo fè konnen yo pito tann entèvansyon otorite yo olye yo sòti ak pwòp volonte pa yo.
“Nou pap sòti, n ap rete anndan an pou nou montre nou pa t fè anyen nan touye prezidan an”, se sa plizyè nan yo deklare nan videyo a, pandan yo te pwofite mande èd lapolis paske yo te santi lavi yo menase. Nan videyo a tou, li fè wè se lòt prizonye ki t ap di yo pou yo sove kite prizon an. Sepandan, ansyen chèf Inite Sekirite Jeneral Palè Nasyonal (USGPN) la, Dimitri Herard ak ansyen kòdonatè jeneral palè nasyonal la, Laguel Civil, ki yo menm tou akize nan lanmò 58yèm prezidan an, ta disparèt nan chanm yo te ye a depi aprè atak la.
Daprè sa yo di, nan moman atak la te gen gwo afwontman ant lapolis ak bandi ak zam kote gen moun ki ta viktim, sa ki te mete gwo laperèz bò kote yo yo menm. Yo te evite sòti, puiske yo te gentan jwenn kèk polisye ki te avèti yo gen gwo danje nan anviwon prizon an.
N ap fè konnen, Djouma, Ezéchiel alyas Ze, Ti Greg, Bout Janjan se pami gwo chèf gang ki ta sove kite prizon an depi nan lannuit 2 mas la. Pou kounya, poko gen pyès lòt detay bò kote otorite yo ki pou ta presize konbyen prizonye antou ki rive chape poul yo.
Atik sa se pwopriyete prive ©️ Gwoup Medya MAGHAITI 2024
