Aprè plizyè jou ap tire san pran souf nan lakou Pòtoprens, nèg ak zam ki t ap tante kraze penitansye nasyonal la rive kraze yon pati ladan l jodi samdi 2 mas 2024 la. Selon divès videyo k ap sikile sou rezo sosyo yo, chèf gang Izo ta gen dwon li sou espas prizon an kote divès lòd ap pase pou atake pi byen pi gwo sant kaseral peyi a.
“Gen yon pati nan prizon an ki kase anpil gwo bandi nan lari“, Daprè dènye pòs Sendika Nasyonal Lapolis la fè sou kont X li jodi a. Ki fè konprann tou, pa t gen okenn dispozisyon ki te pran pou ranfòse prizon an malgre tout anons atak ki t ap fèt depi m maten yo.
Menm avan sa, SYNAPOHA a ak tout SPNH-17 te gentan fè konnen nan moman atak la polisye yo t ap fè gwo jefò pou fè fas kare ak nèg ak zam yo. Men, malgre tout SOS pou Wo kòmandman an anyen pa t fèt jouskaske kèk polisye te blije bay vag kote jounen jodi a plizyè prezime bandi ta nan lari.
Sepandan, divès lòt videyo te gentan fè kwè pòtay prizon an te louvri, men te toujou gen gwo rafal kout bal k ap tire douvan prizon an avan sa. Anplis atak sila, plizyè lòt zòn twouve yo anba bal aswè a.
Pandantan sa, plizyè sitwayen rive anvayi espas ministè kominikasyon an kote yo ta piye epi chwazi l aswè a pou yo rete, puiske yo te kite lakay yo akòz afwontman lapolis ak nèg ak zam nan anviwon channmas yo.
Atik sa se pwopriyete prive ©️ Gwoup Medya MAGHAITI 2024
