Depi 29 fevriye pou rive 2 mas jounen jodi a, Lapolis ak plizyè gwoup gang pa sispann afwonte nan divès lokalite nan peyi a. Sa ki lakòz anbasad Ameriken konseye tout sitwayen li yo pou pa mete pwent pye yo nan peyi Dayiti depi ayè premye mas 2024 la, anplis li mande avèk sila yo ki te deja sou teritwa a pou yo fè yon ekstrèm pridans, sitou kote ki gen gang ak manifestasyon pou yo pa ale. Selon enfòmasyon ki pibliye sou paj X(Twitter) anbasad la.
«Evenman k ap pase aktyèlman la, rete vrèman enprevizib. Gwo vag vyolans k ap dewoule jounen jodi a ka gen gwo reta ak nui fonksyoman anbasad Ameriken an Ayiti epi genyen yon enpak negatif sou kapasite pou l founi sèvis nan konsila, sitou nan pwogram ijans yo», daprè sa anbasad la fè konnen atravè nòt sila.
Sou yon lòt bò, anbasad la pataje kèk konsèy avèk sila yo ki ta vle vwayaje vinn an Ayiti : Yo dwe evite foul, siveye medya lokal yo pou yo ka gen tout dènyè enfòmasyon yo, evite manifestasyon oubyen espas ki gen twoub yo sinyale nou, fè anpil atansyon, konsyan kote n prale, evite mache lannuit, rete veye ak zòn ki gen touris oksidantal yo, pase an revi plan sekirite pèsonèl nou epi toujou mete dokiman vwayaj nou yon kote ki aksesib. Anplis, pa neglije mache avèk idantite nou nan moman sa.
Atik sa se pwopriyete prive ©️ Gwoup Medya MAGHAITI 2024
