Atravè yon nòt yo pibliye jounen jodi samdi 2 mas 2024 la, Ofis Pwoteksyon Sitwayen (OPC) kondane zak ansasinay 5 polisye ki te jwenn lanmò trajik yo anba men bandi nan sou komisarya bon Repo a. Se pou sa, enstitisyon dwa moun nan fè konnen l ap sipòte Sendika Polis Nasyonal Dayiti 17 (SPNH-17), kote yo mande chèf Lapolis la pran desizyon pou yo ale dèyè kò polisye sa yo.
Malgre tout apèl SOS polisye yo te lanse nan moman atak bandi yo t ap fè nan sou komisarya bon Repo a, okenn sipò pa te rive jwenn yo nan moman an. Sa ki te pral lakòz ansasinay 5 vanyan polisye yo, ladan yo 2 fanm. Kote kò enspektè Junior Marion li menm ta pral sikile sou tout rezo sosyal yo.
«5 polisye sa yo te pral mouri nan sou komisarya bon repo, ki retwouve l nan komin kwadèboukè pandan yo te nan kad sèvis enstitisyon polis la», pou fè konnen OPC nan nòt sila.
Evenman tris sila raple n divès masak ki te fèt sou Lapolis deja, nan dat 12 mas 2021 an anndan Vilaj Dedye, ansasinay polisye Laboul yo nan dat 13 Septanm 2022 a, epi ansasinay polisye nan Latibonit yo, nan dat 25 janvye 2023 a. Akòz endiferans total responsab nan Lapolis la, toujou daprè sa yo ajoute.
Ofis Pwoteksyon Sitwayen pwofite voye senpati bay fanmi 5 polisye yo. Pandan yo kondane Konsèy Siperyè Polis Nasyonal la ak Wo kòmandan Lapolis la, ki selon yo menm pa mete mwayen efikas poi polisye yo pou pemèt yo mennen bon jan operasyon, men ki pito ap ret tann vini yon fòs miltinasyonal ki poko janm prè vrèman.
«OPC mande anplis ak ankouraje popilasyon an pou yo kolabore avèk Lapolis ki gen pou deviz pwoteje ak sèvi epi sousye libète chak grenn moun ak respè dwa moun yo. Pandan, y ap pwoteje valè demokratik nan moman kriz jeneral sila», pou fini nan nòt OPC a.
Atik sa se pwopriyete prive ©️ Gwoup Medya MAGHAITI 2024
