Nan kad Misyon Miltinasyonal Soutyen pou Sekirite (MMSS) kominote entènasyonal la vize pou Ayiti a, peyi Benen ta pare pou l voye 2 000 sòlda sou sòl ayisyèn nan. Daprè jounal Africanews, se anbasadris amerikèn nan Nasyonzini an, Linda Thomas-Greenfield ki fè anons la ayè lendi 26 fevriye 2024 la, nan 46yèm reyinyon chèf gouvènman peyi CARICOM yo.
“Dirijan CARICOM yo soulinye li t ap bon pou ta gen plis fòs frankofòn toujou“, daprè sa AP news rapòte sou sa anbasadris la te deklare pandan l t ap anonse sa, kote l felisite gwo tèt nan peyi Benen ki aksepte voye sòlda nan fòs la. Se nan sans sa tou, li deklare li se yon ijans pou misyon an ta vini prese prese pou ede lapolis la tabli lapè ak sekirite.
Yon lòt kote, pou sa ki konsène patisipasyon Etazini nan fòs la, madanm nan fè konnen yo deja ap jwe pati pa yo a pandan y ap rasanble moun. Li presize tou, se pou sa yo pwomèt 200 milyon dola vèt pou pèmèt Kenya ki nan tèt fòs la kapab jwenn bon jan mwayen pou vinn opere an Ayiti.
N ap raple, divès peyi tankou Beliz, Bayamas, Itali, Espay, Mongoli, Senegal, Sirinam, Gwatemala, Perou, Jamayik, ak Antigwa-Barbuda se lis peyi sa yo ki te anonse y ap patisipe nan fòs etranjè a k ap gen pou vini nan peyi a. Pandantan sa, Etazini, Kanada, Giyàn nan bò pa yo fè konnen se lajan y ap mete.
Credit Photo: Web TV
Atik sa se pwopriyete prive ©️ Gwoup Medya MAGHAITI 2024
