Kèk tan aprè jij Al Duniel Dimanche deside poze sele sou 2 lokal Sant Nasyonal Ekipman yo(CNE) nan zòn Kanapevè ak Site Solèy, otorite nan Konsèy Siperyè Pouvwa Jidisyè yo(CSPJ) mande menm jodi jedi 22 fevriye 2024 la, pou jij la sispann antre nan dosye a. Yo fè demand la nan yon lèt, kote yo konseye majistra a pou l tann manda l renouvle avan pou l ta panse pran yon desizyon.
“Nan korespondans sa nou vle raple w manda jij enstriksyon w fini depi 29 janvye 2024, aprè pwosè vèbal lè w te fè sèman an. Se pou sa, nou mande w pou w rete lwen tout zak enstriksyon pandan w ap tann manda w renouvle aprè”, selon sa ki di nan lèt sa ki pote non prezidan CSPJ a, Jean Joseph Lebrun.
Yon lòt kote, toujou nan lide pou fè konnen jij la pa gen otorite pou l nan koze enstui dosye sitou materyèl CNE yo, CSPJ ak siyati sekretè teknik yo, Jean-Robert Constant te tou pwofite voye menm lèt sa tou bay direktè jeneral lapolis la, Frantz Elbé.
N ap raple, se jij Al Duniel Dimanche ki t ap enstui sou koripsyon rapò Inite Lit Kont Koripsyon (ULCC) te revele ki genyen nan CNE. Li te menm mete 36 manda dèyè moun ki ta enplike nan dosye sa yo.
Atik sa se pwopriyete prive ©️ Gwoup Medya MAGHAITI 2024
