Otorite nan biwo pwokirè jeneral (PGR) dominiken deside boule jodi vendredi 22 desanm 2023 a, plis pase 291 kilo kokayin. Selon N Digital yo fè aksyon sila, se aprè yo fin jwenn rapò Enstiti Nasyonal Syans Medikal (INACIF) ki pwouve tout pwodui sa yo swa se te dwòg oubyen yo te genyen ladan yo.
Nan 291 kilo kokayin pwodui sa yo ki rive boule a, rapò INACIF la revele gen 102 kilo ladan yo ki se te dwòg, alòske lòt 189 kilo a li menm se lòt pwodui yo di ki te gen dwòg nan yo. Yon lòt kote, yo di tou yo te rive boule 633 kès ki te gen divès kalte dwòg nan yo.
“72 kilo se te kokayin kloridrik, 26 kilo te marigwana, 2 kilo krak, 355 gram ak 20 miligram ekstazi, 149 gram ak 650 miligram aschik, 35 gram ak 470 miligram metanpetamin epi 11 gram ak 300 miligram ewoyin“, se pwodui sa yo ki te twouve yo nan 633 kès sa yo ki te sezi sòti 14 pou rive 21 desanm nan, nan zòn pwovens Sendomeng, tankou : Barahona, distrik nasyonal, Santyago, María Trinidad Sanchez, Duarte, La Vega, Altagracia, Azua, elatriye.
Nan menm dosye sa, otorite yo nan Direksyon Nasyonal Kontwòl Dwòg (DNCD) nan tèt kole ak marin epi moun k ap travay nan lè yo a rive sezi menm jodi vandredi a 1.4 tòn pwodui yo di ki sanble ak kokayin nan lokalite Perevia. Nan operasyon sila yo rive arete 4 dominiken epi rive sezi 1 435 kès, yo soulinye yo pral transfere yo nan Enstiti Nasyonal Syans Medikal(INACIF) pou tout analiz yo.
N ap soulinye 9 desanm 2023 a, responsab yo nan biwo pwokirè jeneral (PGR) te boule plis pase 121 kilogram kokayin yo te sezi nan 18 lokalite nan pwovens Repiblik Dominikèn.
Atik sa se pwopriyete prive ©️ Gwoup Medya MAGHAITI 2023
