Menm jan divès bilten Inite idwometeyowolojik(UHM) te avèti sa, divès depatman leve anba dlo depi ayè madi a pou rive jodi mèkredi 20 desanm 2023 a. Selon responsab yo nan UHM, dega sa yo ap fèt nan peyi a se akòz yon fenomèn meteyowolojik ki pote non “Fwonfwa” ki sòti nan peyi Kiba ki ap pase sou peyi Dayiti.
Sid, Sidès, Nip, Lwès, Latibonit, Nò, Nòdwès, Sant ak Grandans, se divès depatman sa yo ki jouskaprezan plis jwenn aktivite lapli pandan jou yo, daprè sa UHM fè konnen. Sepandan, pou kounya selon plizyè imaj ak temwanyaj abitan yo se plis depatman Nò, Sid, ak Nòdwès ki inonde ak dlo pou moman an.
Nan sans sa, responsab yo mande pou popilasyon an rete vijilan pandan y ap respekte tout mezi sekirite yo tankou pa travèse rivyè, pa rete kote ki ka gen deboulonnay tè elatriye. Paske selon estimasyon yo, pandan jodi mèkredi a ap toujou gen lapli ak gwo van e ka menm gen presipitasyon nan zòn Grandans, Nòdwès, Nò, Sidès, Sid, Latibonit, ak nan Sant peyi a.
Pou kounya, daprè dènye bilten Chrisnette Saint-Georges te prezante maten an sou antènn Radyo Tele Karayib, Fwonfwa a ta kòmanse ap kite peyi a, men kite enstabilite dèyè l se sa ki fè ap kontinye gen lapli sou depatman nou site la yo.
Atik sa se pwopriyete prive ©️ Gwoup Medya MAGHAITI 2023
