Aprè l te fin plede koupab nan mwa oktòb ki sot pase a nan kad lanmò ansyen prezidan Jovenel Moïse la, lajistis Ameriken deside kondane jodi madi 19 desanm 2023 a, ansyen palmantè Jhon Joël Joseph pou l pase tout rès lavi l nan prizon. Pandan jijman an jounal CTinsider fè konnen akize a te pwofite pou mande Jij federal la ki sou dosye a gras paske se pa te janm entansyon li pou l touye ansyen prezidan Ayisyen an.
«Plan an te vin depase, nou te vin pa gen kontwòl li ankò, men se pa te janm nan tèt mwen pou m te fè sa, li pa te merite sa», se sa akize a deklare jodi a yon fason pou li te jwenn gras nan men jij José Martinez.
Jij la li menm sou bò pa li te reponn pou fè l konprann menmsi l pa te gen sa nan tèt li pou li te asasinen ansyen chèf Leta Ayisyen an, li te foure tèt li kanmenm nan yon move zafè, selon sa Miami Herald di. Yon lòt kote, jounal la di tou vandredi ki pral vini la ta sipoze gen yon 5yèm akize ki ta dwe plede koupab nan menm dosye sa.
Pou kounya, pami 11 akize ki nan prizon Etazini yo, gen pami 4 sila yo ki te gentan plede koupab nan lanmò a, Jhon Joël Joseph se 3yèm moun aprè Rodolphe jarr epi Alexandro Rivera ki gentan jwenn santans yo ki se pou yo pase tout rès lavi yo nan prizon.
Atik sa se pwopriyete prive ©️ Gwoup Medya MAGHAITI 2023
