Aprè yon premye gwoup moun te louvri pòtay la ak zam nan jou pase yo, ayè jedi 14 desanm 2023 a plizyè lòt endividi ki sòti Repiblik Dominikèn rive kraze baryè a pou te pase ak machandiz. Selon imaj k ap pataje sou rezo yo, endividi sa yo pa t sèlman kraze baryè a, men te pwofite jete yon pati nan pòtay la nan rivyè masak la.
Daprè plizyè sitwayen ki te sou plas aksyon sa ki rive fèt la se yon fason pou montre jan kèk nan yo pa dakò ak desizyon pou otorite Wanament yo te fèmen fwontyè nan bò pa nou an.
“Nou se tijèn nou paka fonksyone, li te lè pou n te fè sa deja”, se deklarasyon yon sitwayen aprè aksyon an te finn fèt an prezans ajan polifwont yo.
Yon lòt kote, otorite dominiken yo menm nan bò pa yo te pwofite kontinye ak pwosesis depòtasyon yo a, kote yo te depòte plizyè migran ayisyen. Konsa tou, majistra Dajabón nan Santiago Riverón te pwofite mete deyò epi jete tout machandiz ayisyen ki t al vann nan mache legim dominiken an nan Dajabón, yon fason pou pouse yo al vann sou fwontyè ayisyen an pito puiske endividi yo louvri pòtay la.
Atik sa se pwopriyete prive ©️ Gwoup Medya MAGHAITI 2023
