Nan yon nòt yo fè sòti jodi jedi 14 desanm 2023 a, responsab Medsen San Fwontyè ki chita kò l Tijo a, anonse yo kanpe tout aktivite nan lopital la pou yon tan yo poko detèmine. Selon sa yo di, yo rive pran desizyon sa akòz plizyè endividi ak zam te atake pèsonèl yo ak yon pasyan yo, jou ki te madi 12 desanm pase a, nan menm zòn lopital la.
“MSF ap anonse aktivite medikal li yo kanpe nan sant ijans Tijo a, pou yon peryòd ki poko defini“, se sa responsab yo ekri nan nòt sila, kote yo pwofite kondane ak tout fòs yo anbyans ensekirite sa ki nan peyi a, e ki rive anpeche yo menm yo fè travay yo ak kè poze.
“MSF rete youn nan dènye òganizasyon entènasyonal ki ap bay swen sante nan kapital ayisyèn nan, nou paka aksepte anbilans nou yo ap sibi atak vyolans sa yo, y ap tire sou pasyan nou yo nan mitan lari. Pou kontinye travay, MSF bezwen enstitisyon medikal li yo, anplwaye li yo, ak pasyan li yo jwenn respè ak pwoteksyon“, daprè pawòl chèf misyon yo a, Benoît Vasseur.
Pandantan sa, yo fè konnen desizyon sa se sèlman pou sant ijans Tijo a yo pran l. Sa ki fè, pòt tout lòt sant yo genyen toupatou nan peyi a ap toujou fonksyonèl e ap toujou ka resevwa malad.
N ap raple se pa premye fwa MSF deside sispann aktivite l yo nan lokal li. Sa te rive deja nan mwa jiyè pase a, pou sant yo genyen Taba a kote plis pase 20 nèg ak zam te antre vinn pran yon malad nan sal operasyon.
Atik sa se pwopriyete prive ©️ Gwoup Medya MAGHAITI 2023
