Direksyon Nasyonal Kontwòl Dwòg (DNCD) ak Ministè piblik nan Sendomeng anonse jodi samdi 9 desanm 2023 a, yo sezi 40 sachè dwòg ki peze 33.7 kilo epi rive arete yon dominiken ki ta enplike nan dosye a, nan pò yo a. Selon plizyè medya dominiken, responsab machandiz yo te sere dwòg la nan tank gaz yon machin ki te dwe ale Pòtoriko.
“Nou jwenn 40 sachè dwòg sa yo nan tank gaz kamyon an, yo chak gen yon gwosè diferan an. Selon analiz Institi Nasyonal Syans Medikal (INACIF) nou jwenn yo peze ansanm 33.7 kilo kokayin”, daprè sa Diario Libre rapòte pandan l soulinye kamyon(Ford) sa te pami plizyè douzèn lòt machin ki te dwe anbake pou ale Pòtoriko.
Pandan menm operasyon sila, otorite yo fè konnen yo te rive mete men tou sou yon sitwayen dominiken 44 lane nan pò a. Malgre arestasyon l, pa gen pyès detay ki bay ni sou idantite l, ni sou lyen li ta gen ak machin yo jwenn dwòg nan li a. Men malgre sa, Listín Diario fè konprann nan kèk tan ankò responsab yo ta sipoze mennen endividi sa a douvan lajistis.
Nan menm dosye dwòg sa, ajan DNCD yo di mèkredi ki te 6 desanm 2023 a, yo te jwenn 33,59 kg kokayin likid nan yon gwo machin ki te chaje ak pwodui sazón likid, ak bwason ki fèt ak lèt toujou nan Tèminal yo a, ki chita kò l nan lokalite Boca Chica. N ap soulinye tou, samdi 2 desanm pase a, kèk ajan siveyan ladwàn ak ajan gad sivil nan peyi Espay te rive sezi nan ayewopò yo a(Adolpho Súarez Madrid-Barajas) 530 kilo kokayin nan 38 kès zaboka ki te sòti Repiblik Dominikèn.
Atik sa se pwopriyete prive ©️ Gwoup Medya MAGHAITI 2023
