Nan yon kominike ki soti jodi samdi 2 desanm 2023 a, rapè ayisyen an Kendy Saint Fleur anonse li kite labèl Evazyon Mizik. Nan pwojè sila a, Ken FS ki te la antanke PDG ak atis, fè konnen se aprè yon chita pale desizyon sa rive pran.
Nan lane 2022, jèn atis Tafa Mi-Soleil te anonse li kite labèl Evazyon Mizik. Anviwon yon lane aprè, se Ken FS ki anonse piblik la li kraze kite sa. “Souvni yo, mizik yo ak moman nou kreye ansanm yo ap toujou gen yon plas espesyal nan kè nou”, nan sa ki ekri nan kominike sila a.
Sa gen kèk mwa depi Ken FS te sòti yon albòm ki rele Panda. Atis la fè konnen se youn nan pi bèl pwojè ki reyalize nan labèl la. “Albòm Panda a rete nan zòrèy meloman yo e li rete nan tout konvèzasyon ak deba tizè bon rap yo”, toujou nan paragraf kominike a.
Atis la tou presize li pa gen move rapò ak fondatè labèl la ki rele Dèf. Li fè konnen se konpè li, parenn pitit li. Li fè konnen l ap toujou kontinye fè mizik pou fanatik li yo.
Atik sa se pwopriyete prive ©️ Gwoup Medya MAGHAITI 2023
