Kèk jou aprè yo te finn atake vil Sodo kote yo te touye plis pase 10 moun, epi met dife nan komisarya a, bandi ak zam fè yon lòt atak nan vil la ak nan lopital Mibalè a sòti nan lannuit 25 septanm nan pou rive madi 26 septanm 2023 a. Nan nouvo atak sila, endividi yo te rive antre nan lopital inivèsitè leta Mibalè a kote yo tire plizyè bal nan divès direksyon.
“Bal pèse tout anndan”, se sa yon medsen nan lopital la fè konnen nan yon videyo k ap sikile sou rezo sosyo yo. Nan videyo a, pèsonèl sante a fè kwè bandi yo ta antre nan sal kote ki gen plizyè timoun ki fenk fèt. Nan sans sa, plizyè medsen lanse SOS akòz lavi pasyan yo ki an danje.
Yon lòt kote, popilasyon an pa sispann eksprime laperèz yo genyen fas ak kout bal k ap chante nan vil Mibalè depi 2è nan maten. Pou kounya anpil nan yo fè konprann y ap kanpe ak Lapolis pou defann vil la paske daprè yo, yo pa gen lòt kote pou yo kouri ale.
Pou sa ki gen pou wè ak sanblan viv ansanm plizyè chèf gang te anonse semèn pase a, premye minis Ariel Henry li menm deklare ayè lendi 25 septanm nan, bandi ak zam ap toujou rete kriminèl.
“Joumou pa donnen kalbas! Gang pa ka bay lapè, gang pa ka viv ansanm, gang se ying yang, gang se divizyon. Zak malonèt ki fèt Sodo, zak kraze brize ki fèt nan Kafoufèy montre nou aklè bandi se bandi, bandi se Kriminèl, bandi se asasen”.
Atik sa se pwopriyete prive ©️ Gwoup Medya MAGHAITI 2023
