Nan yon aksidan ki fèt nan pwovens Valverde nan Sendomeng gen anviwon 18 migran ayisyen san papye ki mouri ayè dimanch 6 dawout 2023 a. Pami viktim yo, otorite dominikèn yo fè konnen gen 2 timoun ki rive pèdi lavi yo tou, selon Diario Libre.
Kontrèman ak pwokirè Aneudy Tejada ki te deklare se te 13 ayisyen ladan yo 2 timoun yo te rive jwenn kadav yo nan kanal dlo kote machin nan tonbe a, nouvo chif yo selon Diario Libre, fè konprann se anviwon 18 moun ki rive peri nan aksidan sa sou teritwa dominiken yo.
Selon enfòmasyon jounal dominiken an bay, migran ki te nan machin sa pa t gen okenn pyès sou yo pou ta rive idantifye yo jouskounya. Se pou sa, yo soulinye machin ki t ap fè trajè a te fè l ankachèt nan lannuit dimanch 5 dawout la, nan lide pou te twouble vijilans otorite polisyè ak otorite migrasyon yo ki toujou aktif pou depòte tout etranje san papye nan peyi yo a.
Malgre pa gen okenn enfòmasyon disponib pou konn konbyen moun ki te nan machin nan, responsab dominiken ki te sou plas yo fè konnen moun yo ki abite nan zòn dram nan te fèt la te rive sove lavi 3 moun. Pou kounya, otorite yo di yo tanmen mennen ankèt pou konnen idantite 18 viktim yo epi jwenn kòz ki bout ak aksidan sa a.
Atik sa se pwopriyete prive ©️ Gwoup Medya MAGHAITI 2023
