Aprè vizit li finn fè nan peyi a yè samdi premye jiyè a, sekretè jeneral Nazyonzini an, Antonio Gutteres, pèsiste pou mande konsèy sekirite Oganizasyon Nasyonzini an pou voye nan peyi Dayiti yon gwo fòs militè k ap ka ede polis nasyonal la kont gang yo. Daprè diplomat la, jouskounya èd lòt peyi yo bay yo pa sifi pou retire Ayiti nan sa l ye la.
Nan sousi pou bay nasyon ayisyen an lanmen, Antonio Gutteres pa sèlman mande pou konsèy sekirite ONU an bay lòd pou yon fòs antre sou teritwa a, men li mande tou, nan sa ki konsène èd imanitè yo pou kominote entènasyonal la mete ansanm pou kontinye ede popilasyon ayisyen an fè fas kare ak grangou, maladi kolera elatriye.
“M solidè ak pèp ayisyen an k ap fè fas ak yon kriz sekiritè, politik, imanitè tèt chaje ki frape chak grenn moun. Vyolans gang yo frape chak kouch nan sosyete a. M enkyete pou m wè kòman popilasyon an san defans fas ak gang yo epi vyolans yo fè. M kondane ak tout fòs mwen vyolans seksyèl gang ak zam yo itilize kont fanm ak ti fi yo pou fè yo pè. Sitiyasyon grav sa mande pou n bay atansyon ak li epi fè l tounen priyorite nou”, daprè deklarasyon Antonio Gutteres.
Yon lòt bò, pandan premye vizit chef LONI an fè nan peyi a, li fè konprann li te gen bon jan dyalòg ant li menm, premye minis Ariel Henry, Wo Konsèy Tranzisyon (HCT) sosyete sivil la, ak pati politik yo. Pou sa, li di l espere tout aktè yo ap mete sou kote enterè pèsonèl yo yon fason pou retabli enstitisyon demokratik yo k ap ka louvri chimen sou eleksyon.
Pandantan sa, nan konferans pou laprès li te bay nan salon diplomatik ayeyopò entènasyonal Toussaint Louverture a, Diplomat la soulinye dosye lanmò ansyen prezidan Jovenel Moïse la, kote l deklare tout moun ki kache dèyè ansasinay sa dwe pase devan jij. Konsa tou, li plede pou demokrasi a retabli byen vit sou teritwa ayisyen an.
Atik sa se pwopriyete prive ©️ Gwoup Medya MAGHAITI 2023
