Nan yon rapò Sant Analiz ak Rechèch Dwa Moun (CARDH) sòti ayè samdi 24 jen an, yo fè konnen nan operasyon bw* kale a gen antou 204 prezime bandi ak pwòch yo ki jwenn lanmò. Selon sa yo fè konprann, yo anrejistre chif sa yo sòti 24 avril pase a pou rive 24 jen 2023 a.
Nan ankèt CARDH mennen sou prezime bandi ak endividi ki pwòch moun sa yo ki rive viktim nan operasyon pèp la te deside fè pou fè fas kare ak prezime bandi nan peyi a, responsab yo di yo rive anrejistre 204 nan moun sa yo ki rive jwenn lanmò pandan 3 dènye mwa sa yo. Selon presizyon ki bay, yo fè konnen chif sa yo gen rapò ak 8 depatman nan peyi a.
Nan depatman Lwès yo jwenn 158 viktim sa ki bay 77.45%, Latibonit yo jwenn 24 sa ki bay 11.76%, nan Grandans chif yo pase ak 12 viktim (5.88%), nan sant yo resanse 5 (2.45%), nan Nòdès yo jwenn gen 2 (0.98%), epi nan depatman Sid, Sidès ak Nò yo anrejistre yon viktim nan chak depatman sa yo.
Pandantan sa, enstans la fè konprann tou gen nan moun sa yo ki rive viktim se akòz gen lòt moun tankou kèk polisye ki pwofite moman an pou regle kont yo ak yo. Pou sa, òganis la rekòmande pou enspeksyon jeneral lapolis la ankete sou zak sa yo nan kèk komisarya ak sou komisarya yo.
Atik sa se pwopriyete prive ©️ Gwoup Medya MAGHAITI 2023
