Peyi Kanada pral gen pou kowòdone misyon sou Ayiti atravè yon biwo li pral gen pou l plase nan peyi Repiblik Dominikèn, akoz pwoblèm ensekirite ak fenomèn gang an Ayiti a, selon sa Radyo Canada rapòte jounen jodi jedi 15 jen 2023 a.
«Peyi Kanada pral gen pou li envesti 20 milyon dola Ameriken pou ouvri biwo sa nan Repiblik Dominikèn, gouvènman Dominiken an pral gen pou jwe wòl entèlokitè ant kominote entènasyonal ak otorite Ayisyen», toujou selon radyo Kanada apati pawòl Mélanie Joly.
Anplis pou minis Mélanie Joly : «Kanada pral gen pou li fè anpil jefò pou bay ekipman ak fòmasyon avèk Polis Nasyonal Dayiti a. Alòske gen yon ekip ki pral gen pou l vin Pòtoprens pou kowòdone aksyon yo avèk gouvènman an.»
N ap raple peyi Kanada kontinye pran sanksyon kont ansyen otorite Ayisyen jounen jodia, kòmkwa yo ta moun ki ta patisipe nan zak koripsyon ak vyolasyon dwa moun nan peyi a, presizeman ansyen depite Prophane Victor epi ansyen senatè Garcia Delva jodi jedi a.
«Repiblik Dominikèn pral gen pou benefisye avantaj li nan misyon an. Peyi Dominiken gen avantaj pou l nan amelyorasyon sitiyasyon sekirite ak politik an Ayiti an», selon deklarasyon ansyen anbasadè Kanada an Ayiti a, Henri-Paul Normandin.
Atik sa se pwopriyete prive ©️ Gwoup Medya MAGHAITI 2023
