Aprè popilasyon nan vil Okap finn deside pou di yo pap akeyi pyès otorite pou seremoni ofisyèl drapo a, kèk militan nan vil Akayè yo menm tou leve kanpe pou di non kont desizyon pou al fete fèt drapo a nan 2yèm vil peyi a. Nan sans sa, yo di nenpòt jan se ye se Akayè fèt drapo a ap fèt.
“18 me sa nou menm pèp ayisyen se Akayè nou pral fete drapo nou paske se l al te koud. Fèt drapo a pap deplase, Akayè gen yon istwa, tout vil nan peyi a gen yon istwa“, se pawòl sa yo kèk sitwayen deklare nan mikwo laprès pandan yo envite popilasyon an leve kanpe pou desizyon gouvènman an pa tounen yon abitid e lakòz vil drapo a pèdi idantite l.
Yon lòt bò, kèk lòt sitwayen nan vil la te deklare ayè madi 16 me a nan yon konferans pou laprès, se yon estrateji premye minis la ap fè nan lide pou febli pèp la ki konsantre yo sou operasyon bw* kale a kont bandi yo. Nan sans sa, yo menm tou yo fè konnen yo pap dakò paske yo se moun ki bay drapo yo ak tout peyi yo enpòtans ak anpil respè.
“Nou mande prese prese ak gouvènman defakto a pou retounen fèt Akayè a nan plas li, nan site drapo a paske se la li te koud, se idantite n”, daprè sa yo fè konprann.
Pou kounya, moun Akayè deja ap fè gwo preparasyon alòske nan Nò peyi a, premye jounen fèt la ta dwe kòmanse jodi 17 me a nan lide pou fete epi onore pwofesè yo nan inivèsite Wa Henry. Nan konsa, li rete pou konnen kibò 220yèm lane drapo a ap gen pou l selebre tout bon vre.
Atik sa se pwopriyete prive ©️ Gwoup Medya MAGHAITI 2023
