Nan yon nòt piblik Òganizasyon Sitwayen pou Nouvèl Ayiti mete deyò jodi madi 16 me a, li denonse vyolasyon dwa fanm ak timoun nan koze fè paspò, malgre kreyasyon platfòm demann anliy Dokiman idantite a (DELIDOC).
Òganizasyon dwa moun nan di li konstate gen anpil difikilte pou moun yo jwenn paspò nan men Leta, malgre gouvènman an te lanse DELIDOC pou fasilite moun yo jwenn dokiman an.
«Poutan, jounen jodia ankò aksè pou gen paspò a toujou rete yon veritab kalvè. Pou yon moun fè paspò l ap koute li anviwon 25 ak 50 mil goud nan men raketè, poutan pèsonn moun pa epanye avèk zak sa. Gen aksè avèk randevou pa fasil pou tout moun. Sitou sitiyasyon sa fè fanm yo vilnerab», selon temwanyaj enstitisyon dwa moun nan jwenn nan men kèk viktim.
Pou kontinye òganizasyon dwa moun nan fè konnen : «Genyen yon paspò oubyen yon dokiman vwayaj se yon dwa moun nan genyen, pèsonn moun pa piwo pase lalwa.»
Paralèlman, OCNH mande responsab nan imigrasyon an Ayiti pou pran responsabilite yo pou garanti dwa chak sitwayen ki vle gen paspò nan peyi an. Anplis OCNH rekòmande responsab yo pou amelyore kalite sèvis epi fasilite trètman apwopriye avèk fanm yo epi timoun yo.
«Nou mande Leta Ayisyen pou respekte dwa tout sitwayen fanm kou gason nan kesyon pyès idantite. Anplis, nou envite Ministè Enteryè ak Kolektivite teritoryal pou nome yon nouvo direktè teknik pou ranplase ansyen direktè a ki te demisyone depi anviwon 11 mwa, epi elabore yon plan pou pote bon jan solisyon nan sèvis imigrasyon an kounya nan lide pou bay yon sèvis san patipri ni vyole dwa moun», selon sa OCNH di nan kominike sila.
Atik sa se pwopriyete prive ©️ Gwoup Medya MAGHAITI 2023
