Youtoubè ak enfliyansè ameriken an, Addison Pierre Maalouf alyas Arab arete epi twouve l nan gadavi Okap jounen jodi premye avril 2024 la akòz yon machin li te lwe li pa ta remèt. Aksyon sila pase alòske divès moun te eseye agrese li pandan li t ap eseye kite peyi a nan Ayewopò Entènasyonal Okap la pou li rantre nan peyi Etazini, selon Lavwad Lamerik VOA kreyòl.
Nan ka sa, mezon machin kote li te lwe a, mande pou Maalouf bay machin nan oswa bay 4 000 Dola ameriken kòm dedomajman. Sepandan, youtoubè ameriken an nan bò pa l fè konnen li gentan kontakte fanmi l pou voye kòb la pou li.
Se gras avèk entèvansyon Lapolis ki fè Addison Pierre Maalouf te pral epanye anba presyon moun Okap pandan li t ap eseye kite peyi a. Sitou sa pa gen lontan depi li menm ak fiksè Jean Sacra Sean Roubens te sibi zak kidnapin nan zòn kwadèboukè nan jou pase yo.
Enfliyansè a ki gen pou nasyonalite amerikèn men ki gen orijin li nan peyi Liban te jwenn liberasyon li pou 50 000 dola vèt vandredi ki te 29 mas la. Liberasyon l te vini aprè gang 400 mawozo a te mete deyò yon bout videyo, toujou selon sa Lavwad Lamerik VOA rapòte.
Addison Pierre Maalouf ak fiksè Jean Sacra Sean Roubens te pase 17 jou anba men ravisè yo san yo pa te frape yo ni fè yo mal, selon sa yo te fè konnen nan videyo gang yo te sòti a. Byenke sa pa te anpeche yo peye yon kantite lajan pou yo te ka jwenn liberasyon anba men chèf gang lanmò 100 jou.
Atik sa se pwopriyete prive ©️ Gwoup Medya MAGHAITI 2024
