Jounal ”Miami Herald” fè konnen jodi mèkredi 7 desanm 2022 a, youn nan prezime asasen prezidan Jovenel Moïse la, deklare misyon yo se te pou pran yon lajan ki te sere kay ansyen chèf leta a. Daprè deklarasyon kèk ladan yo ki nan prizon pou dosye sa, lajan an te anviwon 45 ak 53 milyon dola ameriken.
Daprè ankèt bò kote otorite kolonbyen yo, yo fè konprann misyon prezime asasen yo se te pou sezi yon lajan anndan kay ansyen chèf leta a. Men, enstriksyon yo te chanje kèk tan avan yo te rive lakay prezidan an, akòz yo te pase yon nouvo lòd. «Misyon an te vin doub: jwenn ak touye Moïse, jwenn epi sezi sak lajan ki te lakay li a» toujou selon sa jounal Miami Herald fè konnen.
«Youn nan prezime asasen yo te di anketè Ameriken yo, ki gen yon ankèt y ap mennen tou, li te konnen lajan ki te anndan kay Jovenel Moïse la, se te yon rekonpans pou dirijan Ayisyen an nan men trafikan dwòg ki t ap pwofite peyi l la pou fè pase dwòg kolonbyen yo ale nan peyi Etazini», se sa jounal la soulinye.
Yon lòt kote, daprè temwanyaj kèk ladan yo ki deja nan prizon bay anketè 2 peyi konsènè nan zak asasinay ansyen prezidan an, lajan prezime asasen yo te gen pou pran an se anviwon 45 ak 53 milyon dola ameriken.
Nan menm sans sa, yon sous kolonbyen te deklare «Nou panse se lajan
yo t ap chache» bay jounal Ameriken an nan yon entèvyou. Menm sous sa, pi douvan ta pral mansyone malgre l panse se lajan yo t ap chèche, daprè deklarasyon kèk nan prezime asasen yo ki te mete lajan an nan yon tarif, ” li paka konfime si se vre, si se pa vre konsènan montan 45 milyon dola Ameriken an jan anketè kolonbyen yo te enfòme l la”.
Nan menm kad dosye sila a, jounal ameriken an mete aksan sou anketè Ameriken yo ak Kolonbyen yo, ki selon sa yo di, pa montre okenn enterè pou yo ta pousuiv ankèt yo nan sans pou ta fè lyen ant lajan ki se ta yon sipoze kòb rekonpans kèk trafikan dwòg te bay ansyen prezidan an, ak yon sipoze lis ansyen chèf leta a te prevwa bay otorite ameriken yo ki ta sanble mennen ak lanmò l lakay li, 7 jiyè 2021 an.
Kontrèman ak sa ankèt kolonbyen yo revele, youn nan kolonbyen ki nan prizon pou enplikasyon li nan asasina Jovenel Moïse la Alejandro Giraldo Zapata te deklare lapolis Ayisyen « asasinay Moïse te prepare davans.» Poutan, malgre 4 jij pase nan tèt dosye lanmò ansyen prezidan an, pèsonn poko konn kilè rezilta final yo ap tonbe.
Photo: LaPresse.ca
Atik sa se pwopriyete prive ©️ Gwoup Medya MAGHAITI 2022
