Alòske tout ayewopò entènasyonal peyi Dayiti yo fèmen, men sa pa anpeche gen konpayi elikoptè dominiken ki kontinye ap fè gwo lajan nan vin pran gwo zouzoun Ayiti pou ale ak yo Sendomeng. Selon Miami Herald, yon vòl nan elikoptè sa yo, koute ant 10 000 ak 15 000 dola vèt paske daprè jistifikasyon pilòt dominiken yo se yon operasyon ki gen anpil danje.
“Kòm operasyon pou retire moun yo fèt nan kondisyon ki gen anpil danje, konpayi ayeryen yo egzije gwo lajan. Yon pilòt dominiken te deklare yon vòl nan elikoptè chatè ka koute sòti nan 10 000 ak 15 000 dola vèt, men li kapab gen lajan sou li toujou kòm gen vyolans ak difikilte pou w jwenn gaz an Ayiti”, se sa jounal ameriken an revele nan yon atik yo pibliye nan lannuit vandredi 15 mas 2024 la.
Sepandan, Miami Herald presize gen etranje ki chaje ak lajan ki menm rive peye 80 000 ameriken pou yon grenn plas sèlman pou retire tèt yo nan peyi Dayiti. Lòt rezon ki fè vòl sa yo chè konsa, se paske jwenn otorizasyon bò kote otorite dominiken yo pou vin retire etranjè isit la se pa yon bagay ki fasil ditou.
Dayè Emerald Solutions Group, ki ta youn nan konpayi ki gen baz li Dubaï ki fè vwayaj sa yo sot “nan kèk kote ki sekrè nan kapital Ayisyèn an“, pou al Sendomeng konn paka jwenn otorizasyon, daprè Miami Herald. Nan menm sans sa yo mansyone, plizyè lòt konpayi ta lage nan mande otorizasyon tou, puiske gen anpil demann aktyèlman la.
Pou kounya, jounal la fè konnen pa gen vòl. Men, pyès moun pa konnen kilè vòl nòmal yo ap retounen tou, paske kounya la avèk vòl ijans sa yo, kèk konpayi transpò ayeryen ak otorite dominikèn yo ta sanble antre plis lajan.
Atik sa se pwopriyete prive ©️ Gwoup Medya MAGHAITI 2024
