Zak vyolans sou elèv lekòl yo pa sispann fèt sitou nan zòn pwovens yo. Ayè lendi 20 me 2024 la, plizyè videyo ki pataje sou rezo sosyal yo montre yon pwofesè lekòl k ap maspinen ak kou yon ti fi ak tout inifòm lekòl sou li anndan sal klas li. Selon detay ki bay yo, zak sa a pase nan «Institution Mixte Georges Sylvain» ki chita kò l nan Senmak.
«Madmwazèl sòti deyò», se aprè pawòl sa yo, endividi sa a yo bay pote non “Pastè” a te kòmanse tire kou sou viktim nan jouk li te rive trennen l bò pòtay klas kote yo te ye a. Se yon aksyon kriminèl elèv nan menm lekòl sa a te denonse nan videyo ki pataje yo, poutan sa a pa t anpeche mèt krim nan te kontinye jouk viktim nan te rive nan yon faz kote sante l te menm rive atake.
Kèk tan aprè, divès moun pa t mete dlo nan bouch yo pou kontinye denonse move zak sa a ki pase Senmak la. «Nou kondane zak sa a, endividi mal entansyone sa a dwe resevwa sanksyon l merite a», selon premye reyaksyon nou jwenn.
Yon kote moun yo ap mande pou Ministè Edikasyon Nasyonal ak Fòmasyon Profesyonèl (MENFP) aji, yon lòt kote gen moun ki mande sekou lajistis. Selon estimasyon yo, lajistis ayisyèn ta dwe arete endividi sa a pou kite yon egzanp pou tout lòt pwofesè oubyen direktè ki ta panse fè vyolans sou yon elèv lekòl.
N ap raple, 2 me ki sot pase a MENFP te deside retire direktè Anebert Joseph nan sistèm edikatif ayisyen an. Responsab yo te pran desizyon sa a aprè direktè sa te fè zak vyolans grav sou yon timoun 22 avril 2024 la. Avan sanksyon yo Joseph te nan tèt lekòl nasyonal «Béthel Bethesda» ki twouve l nan Nòdès peyi a.
«Ministè a mande tout direktè lekòl respekte dwa ti moun yo genyen pou yo aprann san vyolans anndan lekòl yo», se rekòmandasyon otorite yo nan sistèm edikatif la, yon fason pou evite pèp ayisyen an fè fas kare ak modèl zak kriminèl sa yo nan sosyete a.
Atik sa se pwopriyete prive © Gwoup Medya MAGHAITI 2024
