Aprè pi wo responsab yo te deside revoke Raoul Pierre-Louis nan tèt Bank Nasyonal Kredi (BNC), aprè non l te site nan eskandal kòripsyon, yon nouvo konsèy enstale nan tèt Bank la jodi madi 13 dawout 2024 la.
Konsèy sa gen ladan li Pierre André Agélus, Pascale Valembrun Désinor ak Evens Jérôme. Moun sa yo ap gen pou wòl pou yo korije kalite aksyon BNC ap tanmen, daprè sa
gouvènè Bank Repiblik Ayiti (BRH) a, Ronald Gabriel fè konnen.
Selon detay gouvènè Bank santral la bay, Konsèy sa ap genyen tou pou l veye sou aplikasyon zouti ki la pou kontwole jesyon risk solid yo. Se yon fason k ap pèmèt yo kenbe pi byen estabilite nan bank lan, puiske li konsidere BNC kòm twazyèm bank ki pi gwo nan peyi a.
Pou sa ki konsène Raoul Pierre-Louis, li te jwenn revokasyon l nan tèt BNC a se akoz li te revele te gen 3 konseye prezidansyèl ki te mande l 100 milyon goud pou l te rete nan tèt bwàt leta a. Se sa ki fè, semèn ki sot pase a Inite Lit Kont Kòripsyon (ULCC) te tande l nan kad ankèt k ap mennen sou dosye koripsyon sa a.
Se nan yon lèt ki te al jwenn li nan dat 8 dawout pase a, Premye minis defakto a, Garry Conille te deside enfòme Pierre Louis li pèdi dyòb la.
Pou kounye a, 3 konseye prezidansyèl sa yo toujou nan pòs yo. Malgre divès òganis nan sosyete a tankou Rezo Nasyonal k ap Defann Dwa Moun yo (RNDDH) ki egzije pou ranplase yo nan KPT a.
sa se pwopriyete prive ©️ Gwoup Medya MAGHAITI 2024
