Yon migran ayisyen rive blese tousuit aprè lapolis dominiken ta met men sou li nan zòn Dajabón ayè mèkredi premye novanm 2023 a. Kontrèman ak abitan dominiken yo ki akize l kòm yon vòlè e ki te rele lapolis pou sitwayen an li deklare jodi jedi 2 novanm nan, nan mikwo VOA kreyòl sou fwontyè Wanament la, li pa gen anyen pou wè ak vòlè afè moun nan Sendomeng.
Felius Fayès se sitwayen ayisyen sa ki selon sa l di rive viktim anba men lapolis dominiken. Menm jan li fè deklarasyon an nan laprès jodi a, se konsa tou yon videyo k ap sikile sou rezo sosyo yo montre aklè fason po do sitwayen an leve aprè otorite polisyè dominiken yo ta trennen l nan wout Dajabón nan jouskaske yo te rive mete l nan machin.
“Panyòl yo rele polis vinn pran m yo di konsa se vòlè m ye, alòske se pa vre ditou sa yo di a. Se pandan m nan gran wout Dajabón nan yo pran m, menm mayo m yo chire. Polisye dominiken yo ban m minòt ni nan men ni nan pye epi trennen m nan alsfat la anvan m resi rive pou m monte nan machin nan”, se sa Felius fè konnen pandan l prezise pa gen okenn moun ki te pran tan pou poze l pyès kesyon avan yo te arete l la.
Pandantan sa, san bay plis detay li fè konnen nan moman lapolis arete l nan zòn Dajabón nan se Wanament li t ap vini. Mete sou sa, li fè konprann li gen madanm ak pitit e gen 13 lane depi y ap viv nan lokalite Partido, an Repiblik Dominikèn.
Aprè aksyon sila finn pase ayè mèkredi a, se lapolis dominikèn ki te vinn remèt sitwayen ayisyen an bay otorite ayisyen yo jodi jedi a. Se konsa, yo konseye viktim nan pou pran chimen lopital, yon fason pou blese yo pa enfekte nan do li.
Atik sa se pwopriyete prive ©️ Gwoup Medya MAGHAITI 2023
