Jean Modes Fontas se non sitwayen Ayisyen sa ki mouri Repiblik Dominiken jodi samedi 11 fevriye 2023 a, aprè l te fin resevwa bal nan men ajan imigrasyon dominiken. Daprè sa jounal Listín Diario rapòte, sitwayen sila a te nan yon bis ak lòt migran Ayisyen pandan ajan yo te deside arete yo.
Selon rapò medsen ki t ap bay viktim lan swen an bay, Jean Modes te pran bal la nan kòt gosh li, sa ki vin mennen yon chòk emorajik lakay li, ki rive touye l.
Nan menm kad dosye sa, jounal la fè konprann sikonstans ki ta mennen lanmò sitwayen Ayisyen an, jwenn baz li aprè kèk migran te deside proteste kont ajan migrasyon dominiken yo, ki te vle arete yo ayè vandredi 10 fevriye 2023 a, nan Cap Cana ki chita kòl nan pwovens Altagracia.
“Ensidan an te pase pandan kèk resòtisan Ayisyen t ap vwayaje nan yon bis, kote ajan migrasyon ak lapolis te rive arete yo, poutèt sa yo te proteste, tire wòch akòz operasyon an”, se sa jounal dominiken an tante eksplike pandan yo tou pwofite mansyone gen yon polisye dominiken ki te pran bal tou.
N ap raple pou kòmansman ane sa a, operasyon depòtasyon masif Ayisyen yo ta sanble ralanti. Pou kounya pa gen okenn detay ki bay pou ta konnen si operasyon yo toujou fèt ak menm fòs pa rapò ak ane ki sot pase a.
Atik sa se pwopriyete prive ©️ Gwoup Medya MAGHAITI 2023
