Nan yon rapò Direksyon Santral Polis Jidisye (DCPJ) ki gen dat 15 jiyè 2024 men ki rann piblik jounen madi a 20 dawout la, jounalis Yvener Sylla Phanor Lapolis te arete 12 mas 2024 la bay non plizyè jounalis ki konn al nan dosye gang avèk li.
Nan temwanyaj li, kameraman nan deklare li pa sèl jounalis ki konn al nan aktivite gang yo, men se plizyè lòt konfrè ki konn akonpanye l. Nan sans sa, li site non jounalis VOA Kreyòl la, Matiado Vilmé, Yvenson Jourinvil k ap travay pou radyo Zenit, Mackendy Victor pou radyo Emansipasyon FM, Stanley Jaccis li menm ki se jounalis Bon zen TV, Manno ak Machann Zen Ayiti.
Yvener Sylla Phanor se ansyen jounalis radyo ak tele Pasifik sa ki daprè ankèt DCPJ a ta genyen gwo koneksyon ak gang ki nan kowalisyon Viv Ansanm nan. Pou jistifye sa, nan rapò a, yo montre nimewo telefòn bandi yo anrejistre sou 2 telefòn jounalis la posede. Men tou, yo rapòte yo jwenn kapti ekran nan bouyon telefòn yo sou divès apèl konferans ki te fèt.
Aprè kapti ekran yo, rapò a soulinye tou plizyè mesaj vokal ki pataje ant jounalis la ak plizyè chèf gang. Pami yo yon vokal sou konplo ki t ap fèt pou te anvayi Palè Nasyonal. Nan menm sans sa, yo site plizyè kote jounalis la konn ye nan moman li konn an kontak ak bandi yo.
Daprè rapò sa yo anketè yo rete kwè Yvener Sylla Phanor genyen bon jan rapò ak chèf gang yo nan peyi a. Poutan, pou defann tèt li travayè laprès la eksplike relasyon sa li devlope ak bandi yo se pou te kapab preche lapè ant yo.
Atik sa se pwopriyete prive ©️ Gwoup Medya MAGHAITI 2024
