Nan yon atak endividi ak zam fè sou li jodi jedi 14 desanm 2023 a, Montas Rigaud ki se yon fòmatè nan lekòl Nasyonal Polis la sòti blese ak bal. Selon Sendika Polis Nasyonal Dayiti a(SPNH-17) atak sila ta fèt efektivman bò akademi polis la nan zòn Wout Frè.
Daprè imaj Sendika a pataje sou kont X yo, polisye Montas Rigaud rive pran bal nan men dwat li aprè echanj kout bal ak endividi yo. Pou kounya, pa gen okenn detay sou eta sante polisye sa ki sòti nan 19yèm promosyon lapolis la, men selon sendika a ka enstriktè a te nesesite ijans puiske, yo soulinye Akademi an te dwe jwenn yon anbilans prese prese.
Nan sans sa, responsab SPNH-17 yo te tou pwofite denonse aksyon sa ki pase a, pandan yo fè konnen li pa nòmal pou yon kote ap fòme polisye pou sekirize moun alòske, fòmatè yo, yo menm ap viktim ensekirite.
Se pou sa, enstriktè nan Akademi Nasyonal Polis (ANP) yo te tanmen yon jounen grèv lendi 4 desanm nan, nan lide pou te pwoteste kont tout atak yo konn sibi nan men endividi ak zam nan zòn lekòl la.
N ap raple tou, se nan menm zòn nan nèg ak zam te ansasinen komisè divizyonè Harington Rigaud ki se te direktè ANP jou ki te vandredi 25 novanm 2022 a. Endividi yo te kidnape chofè Komisè a e te vòlè machin yo te ladan l la tou.
Atik sa se pwopriyete prive ©️ Gwoup Medya MAGHAITI 2023
