Aprè prizon an te finn sibi atak anba men nèg ak zam wikenn pase a, Kolektif Avoka k ap Defann Dwa Moun yo(CADDHO), fè konnen jodi lendi 4 mas 2024 la, tout prizonye yo sove kite prizon sivil la. Selon detay yo bay sou kont X (Twitter)yo, prizon an te gen antou 1033 prizonye ladan l.
“Pa ret yon grenn prizonye ki rete nan prizon Kwadèboukè a, prizon Kwadèboukè a blanch“, se sa yo fè konnen pandan yo revele se 1033 prizonye ki te genyen nan sant kaseral la avan tout te rive sove nan lannuit samdi 2 mas la.
Mete sou sa, CADDHO fè tout moun konnen nan tout 1033 prizonye ki te anndan prizon sa se sèlman 225 nan yo ki te gentan kondane. Sa ki vle di, gen anviwon 808 prizonye ki potko janm gen chans parèt douvan jij.
Nan menm kad dosye prizonye ki ta kòmanse pran lib abit yo pou sove kite prizon yo nan peyi a, mèt Arnel Rémy atravè CADDHO fè konnen jodi lendi a, nan komisarya Dèlma 33 a gen 6 polisye sou 10 sa ki te nan izolman ki rive sove pandan gen 5 prizonye yo menm ki te chape poul yo. Men daprè dènye detay li te bay, 5 prizonye yo te deside retounen kèk tan aprè pou te pote tèt yo vini nan menm komisarya a.
Atik sa se pwopriyete prive ©️ Gwoup Medya MAGHAITI 2024
