Jan sa te anonse 12 oktòb pase a, jounal Listín Diario anonse jodi madi 17 oktòb 2023 a, teknisyen Òganizasyon Eta Ameriken (OEA) yo rive Repiblik Dominikèn kote yo deja diskite ak kèk responsab dominiken. Selon deklarasyon yo fè, yo fè konnen yo la sèlman nan lide pou vinn mennen ankèt pou jwenn enfòmasyon teknik ki gen rapò ak konstriksyon kanal la nan Wanament.
“Objektif vizit sila se pou n kapab jwenn enfòmasyon teknik k ap pèmèt nou konnen sitiyasyon konstriksyon kanal la sou teritwa ayisyen an“, se sa sekretè zafè jiridik òganizasyon an, Jean Michel Arrighi deklare nan rankont sa ki te gen ant delegasyon OEA a ak plizyè responsab dominiken.
Pandantan sa, minis zafè etranjè dominiken an, Roberto Álvares te tou profite pran devan pou di kanal ayisyen yo ap fè a reprezante gwo danje pou kominote agrikòl yo a, ak pechè yo. Se pou sa, li soulinye prezans espesyalis OEA yo ap itil anpil nan kad pou retabli lapè epi pou kolaborasyon yo ka fèt menm jan sa te konn ye lontan an.
Se nan menm sans sa tou, divès teknisyen dominiken nan Enstiti Nasyonal Resous Idwolik(INDHRI), ak teknisyen nan Enstiti Nasyonal Dlo Potab ak Asenisman(INAPA) te eksplike kanal ayisyen an ka pèmèt gwo inondasyon nan bò pa yo a.
N ap soulinye pa t gen okenn reprezantan ayisyen nan reyinyon sila, alòske se te yon rankont ki te gen rapò ak konstriksyon kanal la nan plèn Maribawou(Nodès peyi a). Poutan, te gen anviwon 17 responsab dominiken mete sou 2 reprezantan OEA ki se sekretè zafè jiridik la Jean Michel Arrighi, ak sekretè devlopman entegral, Andrés Sánchez ki te prezan nan reyinyon sila.
Autor De La Foto: Por el Ojo de la Cerradura
Atik sa se pwopriyete prive ©️ Gwoup Medya MAGHAITI 2023
