Nan yon lèt yo ekri Wo kòmandman polis la jodi madi 19 septanm nan, Sendika Polis Nasyonal Ayisyen yo(SYNAPOHA) mande direktè jeneral lapolis la, Frantz Elbé, pou aji pou polisye ki te oblije kouri kite kay yo nan zòn nèg ak zam kontwole yo.
“Fas ak vye konsta sa nou fè a SYNAPOHA ap mande w pou w pran bon jan dispozisyon pou korije sitiyasyon sa pou n tanmen diskisyon ansanm ak Konsèy Siperyè Polis Jidisyè epi jwenn yon mwayen pou akonpanye polisye sa yo ak fanmi yo sikolojikman, moralman ak finansyèman“, daprè sa Sendika a fè konnen.
Nan menm lèt sila a, responsab yo di polisye sa yo ki kouri kite lakay yo akòz afwontman gwoup gang sou divès zòn tankou Matisan, Kafoufèy, Bèlè, Wout Frè, Site Solèy, santi yo imilye epi lage pou kont yo. Yo di tou, gen nan yo ki paka retounen lakay yo, alòske gen lòt k ap resevwa menas.
Nan sans sa, Sendika Polis la pa mete dlo nan bouch li pou denonse move sitiyasyon sa polisye yo ap viv la, pandan menm yo menm ap sakrifye lavi yo pou mete lapè nan peyi a.
Pou sa ki gen awè ak ouvèti lekòl la, yo presize yon èd finansyè t ap bon pou polisye sa yo yon fason pou piti yo kapab benefisye moso ledikasyon nan peyi a.
Atik sa se pwopriyete prive ©️ Gwoup Medya MAGHAITI 2023
