Nan yon entèvyou espesyal prezidan kenyan an, William Ruto, te bay BBC, vandredi 24 me 2024 la, fòs polis k ap vin mete lapè a ta dwe rive an Ayiti nan 3 semèn ankò nan lide pou retabli lòd sou teritwa nasyonal la akoz zak vyolans gang ki pa sispann ogmante depi aprè lanmò prezidan Jovenel Moïse la.
«Yon ekip planifikasyon te deja sou plas an Ayiti. Ekip la te rankontre ak fòs polis lokal yo pou fè aranjman ki nesesè yo anvan deplwayman twoup Kenya yo», se sa a prezidan William Ruto konfime nan entèvyou sa a.
Anplis, prezidan Kenyan an te deklare: «Ayiti pa sèlman peyi an kriz ki kenbe atansyon nou, gen Kenyan nan 15 misyon diferan atravè monn lan tankou Somali ak Repiblik demokratik kongo deja».
N ap raple jedi 23 me ki sot pase la, gen 2 misyonè Ameriken ki mouri akoz gwoup gang te fin tann yon anbiskad pou yo nan zòn lizon, pou prezidan Kenya a se rezon sa a ki fè peyi li a ap prepare yo pou voye misyon an pi rapid: «Nou pa dwe pèdi moun, nou pa dwe pèdi misyonè. N ap fè sa pou n anpeche plis moun pèdi lavi yo akoz gang yo», se sa prezidan an ajoute.
Sou lòtbò, peyi Etazini bay Kenya estati alye l apati Òganizasyon Trete Nò Atlantik la ki louvri chimen pou kowoperasyon sekirite pi sere ak bay li aksè pou achte zam Ameriken ki pi sofistike yo epi ranfòse relasyon diplomatik ant «Nairobi» ak «Washington».
Pandan tan sa a, prezidan an ensiste pou Kenya kenbe yon politik etranje ekilibre ki pa gen okenn preferans patikilye pou yon Alye mondyal.
«Se pa kesyon nou anfas Lwès oubyen Lès. Nou prale an avan», se repons sa a William Ruto bay BBC sou kesyon sa a «Èske Etazini se Alye privilejye li?»
Pou fini, n ap fè konnen Kenya te pwopoze pou l dirije tèt misyon miltinasyonal k ap soutni sekirite nan peyi d Ayiti ane pase, selon rekòmandasyon Nasyonzini te fè li pou retabli lòd nan yon peyi ki nan zile Karayib la.
«Sitiyasyon sekirite an Ayiti a pa ka tann», se sa a pòt pawòl konsèy Nasyonal sekirite peyi Etazini deklare.
Prezidan Joe Biden, angaje li pou l soutni deplwayman an epi akselere fòs la pou li rantre an Ayiti.
«Gen yon baz ki pral resevwa twoup yo ak ekipman k ap konstwi pou fasilite kolaborasyon ak Etazini, li prèske fini, li nan nivo 70% kon sa a», se sa a prezidan Rutofè konnen .
Atik sa se pwopriyete prive ©️ Gwoup Medya MAGHAITI 2024
